17 jannewaori – 17.00 – En doe was de wereld wit... Poes Marja zag gisteraovend veur de eerste keer sni’j! Wit spul dat zomar uut de locht valen kwam. Ok et leven van poezen zit vol wonderbaorlike gebeurtenissen!
  Ik hebbe gisteraovend op België nog es weer naor de prachtige en ontroerende film The King’s Speech keken. Een film over de staemerende Engelse keuning George VI en zien logopedist Lionel Logue. Logue was d’r de hiele oorlog deur bi’j as George et volk via de radio toesprak. Mit die hulpe overwun George et staemeren veur een groot pat. Een starke vrouw hulp trouwens ok! De beide mannen bin altied vrunden bleven. Een wonderlik mooie film mit fantastisch spel van Colin Firth en Geoffrey Rush. De film kreeg mar liefst twaelf Oscarnommenaosies en wun d’r viere!
  Vandaege zat ik van twaelf tot ien ure in et radiopergramme De plaetekoffer van Jelke Nijboer op Radio West-Stellingwarf Centraol. We hebben overal over praot en ik moch meziek mitnemen die Jacob, de technische man, daor dri’jde. De volgende nommers bin daor op mien verzuuk dri’jd: Wie wil er mee naar Wieringen varen van Shantykoor De Headammers uut Sunt Niek, Het Hoogelaand van Ede Staal, Zunder die van de Stroatklinkers, Durham Town van Roger Whittaker, November van Rowwen Hèze, Swalkerslietsje van Bennie Huisman, Danny Boy van Celtic Woman en Die taal van my hart van Stef Bos en Amanda Strydom (dit zal ok op mien begraffenis dri’jd wodden). Vandemiddag wodde ’k beld deur iene die et pergramme heurd hadde en de traonen d’r van in de ogen kregen hadde. Ik vien dat mooi!
  Wat bin ’k deur die ellendige korona al lange niet meer in et mooie Twente west bi’j Gé in Borne en Johan en Gertie in Almelo. Mar... we holen vanzels wel kontakt. Et is eins de bedoeling dat Johan zien jazzkonserten in oktober weer uut aende gaon. En Gertie maekt ok in disse tied de mooiste keunstwarken! Ze lat heur inspireren deur et prachtige netuurgebied Het Springendal bi’j Ootmarsum. Hieronder twie ni’je keunstwarkies van heur. Wolle en klei op linnen. En... ze bin te koop!


Naor de veurige bladziede