19 juni 8.50 Dit is een supervroeg dagboekstokkien. Ik bin de hiele dag vot en komme vanaovend eerst laete weer thuus en dan hek gien nocht en gao mit een dagboekstokkien an de gang. Ik zal vandaege naor Jan en Diana in Aalten. Ik hadde eerst gister zuld, mar omdat de weersveuruutzichten zo min weren, bin k doe thuusbleven. Mar et hadde aachterof bekeken best kund... Et wodt vandaege mooi en dreug weer, neffens de berichten en et wodt in ieder geval een mooie dag! Dat is een ding dat zeker is!

18 juni 17.00 Ik hadde vandaege de hiele dag vot zuld, mar omdat dr in de loop van de middag en aovend zwaor weer verwaacht wodden kan, hek de vesite een dag uutsteld. Dat ik hebbe now een kollum veur de kraante schreven. Vandemiddag hek veur de rommelbujjen uut (as die temeensen kommen...) op e fiets naor aachterneve en iemker Piet in Wolvege west om acht potten hunning. We hebben mitien even genoeglik praot.
  Ik hebbe de roman Paradijs van Liza Marklund lezen. Ik perbere alle boeken te lezen die ze over Annika Bengtzon schreven het. En dan vanzels et liefste op volgodder, mar dat lokt me niet hielemaole. Dit was ien van de eerste boeken. Annika wodt beld deur een vrouw die andacht vragt veur heur stichting Het Paradijs. Een hulporgenisaosie veur meensken die bedreigd wodden. En dan komt ze in kontakt mit een wanhopige Bosnische vrouw die op e vlocht is veur een Servische moordener... Annika Bengtzon pakt heur wark as misdaodverslaggeefster weer op.


Naor de veurige bladziede